in

“Sezon powèm”, twazyèm rekèy powèm Joubert Joseph

Powèt Jounalis Joubert Joseph siyen samdi 26 desanm pase a, nan lakou Radyo Kiskeya, nouvo rekèy powèm li ki pote non “sezon powèm”.

Nan ti pale ak redaksyon medya a pandan vant siyati liv powèm sa, Joubert Joseph te pwofite pale de liv la pou l di ke ouvraj la gen yon trantèn powèm

“Se yon trantèn powèm ki nan liv la menm pa mete tit nan yo, mwen kite powèm yo konsa pou kite moun yo entèprete tèks yo jan yo vle e nan sezon powèm travay ki fèt la s on travay m te ka di ki fèt sou lang lan”, esplike jounalis Radyo Kiskeya a.

Pi lwen, otè Sezon Powèm lan fè konnen liv sa pale de ripti, tristès ki tente de ewotis tou anndan trantèn powèm ki anndan liv sa.

Sezon Powèm s on liv an kreyòl, otè a eksplike pou fè konnen li pa gen okenn prejije sou kesyon lang

“Mwen menm m te toujou kwè kreyòl s on lang tankou tout lang. Mwen menm, m pa t janm gen okenn prejije nan kesyon lang se sa k fè m pa reflechi chwa lang yo. Si sa vini pou m ekri an fransè mwen ekri an fransè, si sa vini pou m ekri an kreyòl, m ekri an kreyòl”.

Menm kan vant siyati a fèt depi samdi 26 la, Joubert Joseph fè konnen pou moun ki pa t la ki ta renmen jwenn liv la yo ka pase nan lokal “Édition Floraison” ki nan #191, ri Maglwa Anbwàz epi yo ka rantre an kontak ak li sou twidè, Fesbouk, Enstagram sou non Joubert Joseph. Liv la se 400 goud.

N ap raple w byen avan Sezon Powèm, Joubert Joseph siyen 2 premye rekèy deja ki se “15 poèmes pour un million d’étreintes” ak “Léa ou la beauté en mille morceaux”. Powèm Joubert Joseph yo gen nan yo etranje tradui an anglè epi genyen ki adapte nan mizik pa yon chantè fransè ki rele Dominique Tronc.

Written by Ceus isnel

Le bonheur ne s'acquiert pas, il ne réside pas dans les apparences, chacun d'entre nous le construit à chaque instant de sa vie avec son coeur.